राखी के त्योहार

याद आवता राखी के त्योहार दीदीया
एगो धागा भेज दs उपहार दीदीया

बानी परदेस नइखे कवनो उपइया
इहवाँ भेंटाला खाली नगदी रुपइया
हमरे नयना करेला इंतजार दीदीया
एगो धागा भेज दs उपहार दीदीया

रहत रही गावे त भर जा कलाइया
पलभर में टल जाव सगरो बलइया
याद आवेला बचपन के दुलार दीदीया
एगो धागा भेज दs उपहार दीदीया

साइकिल से जा के मिठाई लियाई
बड़की रखउनी कलाई पर बन्हाई
टिका कs के देलु नजर उतार दीदीया
एगो धागा भेज दs उपहार दीदीया

याद आवता राखी के त्योहार दीदीया
एगो धागा भेज दs उपहार दीदीया

• गणेश नाथ तिवारी श्रीकरपुरी