बुरा मत मानीं होली ह

0
603

“बुरा मत मानीं होली ह”
(जोगीरा)
01. आज के लइकी सबके चाहीं,
कामधेनु जस मीत।..टेक
माई बोली मिसिरी लागे,
सासू बोली तीत।।
जोगीरा… सा रा रा रा…
जोगी जी वाह,जोगी जी वाह…

02. बिना सशक्तिकरन के नारी,
नर पर भारी आज।..टेक
होई सशक्तिकरन त समझीं,
रोजे गिरी गाज।।
जोगीरा… सा रा रा रा…
जोगी जी वाह,जोगी जी वाह…

03. नेता जी गइले चुनाव में,
माँगे खातिर वोट।..टेक
फूट पड़ल जनता के गुस्सा,
फाटल उनकर कोट।।
जोगीरा… सा रा रा रा…
जोगी जी वाह,जोगी जी वाह…

04. कुर्सी खातिर भइल लड़ाई,
जइसे भँइसा लsड़े।..टेक
सभापति पार्षद जी भइले,
कीनले सबके खड़े।।
जोगीरा… सा रा रा रा…
जोगी जी वाह,जोगी जी वाह…

05. रह उपवास बड़ी श्रद्धा से,
छsठ मने ला खास।..टेक
परना के दिने घर में काहे,
आवे मुर्गा-माँस।।
जोगीरा… सा रा रा रा…
जोगी जी वाह,जोगी जी वाह…

06. ना मिली रोजगार त देखीं,
हम नेता बन जाएम।..टेक
सारा सुविधा हमरा मिली,
देश लूट के खाएम।।
जोगीरा… सा रा रा रा…
जोगी जी वाह,जोगी जी वाह…

07. सरकारी राहत में चाहीं,
अधिकारी के अंश।..टेक
समझ ना आवे सेवक ह लो,
आकि रावन-कंस।।
जोगीरा… सा रा रा रा…
जोगी जी वाह,जोगी जी वाह…

08. अस्पताल से डॉक्टर गायब,
कइसे छूटी रोग।..टेक
भेंट भइल त नीमन समझीं,
रहे राउर संजोग।।
जोगीरा… सा रा रा रा…
जोगी जी वाह,जोगी जी वाह…

09. काम त जल्दी ऑफिस करी,
जब दियाई घूस।..टेक
बाबू फाइल दउरइहें,
पइसा पॉकिट में ठूस।।
जोगीरा… सा रा रा रा…
जोगी जी वाह,जोगी जी वाह…

10. पुलिस त ह रक्षक त काहे,
उनसे लोग डेराय।..टेक
उहाँ पेराला जनता जइसे,
कोल्हू ऊँख पेराय।।
जोगीरा… सा रा रा रा…
जोगी जी वाह,जोगी जी वाह…

11. जब बेटा माँगे तेहरावन,
घरभर खुश हो जाय।..टेक
सेवक माँगे कहीं दुबारा,
ऊ पेटू कहलाय।।
जोगीरा… सा रा रा रा…
जोगी जी वाह,जोगी जी वाह…

12. ये बबुआ कोचिंग में आवs,
पढ़े हमरा घरे।..टेक
शुरू क देहलस लइका गइल,
फेल होखे के डरे।।
जोगीरा… सा रा रा रा…
जोगी जी वाह,जोगी जी वाह…

13. पर साल के अभियो बा,
गन्ना के बाकी दाम।..टेक
करजा लेके होई किसानी,
कइसे चली काम ।।
जोगीरा… सा रा रा रा…
जोगी जी वाह,जोगी जी वाह…

14. भोजपुरी जब माई भासा,
नीमन गाईं गीत।..टेक
टी.आर.पी. सरियावे खातिर,
बनल बानी मीत।।
जोगीरा… सा रा रा रा…
जोगी जी वाह,जोगी जी वाह…

15. देस ह राउर तब काहे,
देनी विदेस के साथ।..टेक
मत करीं कुछ अइसन रउआ,
झुँके देस के माथ।।
जोगीरा… सा रा रा रा…
जोगी जी वाह,जोगी जी वाह…


अखिलेश्वर मिश्र