ऊँची उठइहS अटरिया बलम

ऊँची उठइहS अटरिया बलम
अंगनइया रखइहS हो।

रोपबि अंगना तुलसी बिरवा
राम सीय शंकर मंदिरवा
पूजा साँझ भोरहरिया बलम
अंगनइया रखइहS हो।

लाल धजा लहरात अकासे
मनी सजी तिउहार हुलासे
भरि जगमग जोति नजरिया बलम
अंगनइया रखइहS हो।

ललना पलना अंगना डारबि
नित नव मंगलगीत उचारबि
गूँजी सुहावन सोहरिया बलम
अंगनइया रखइहS हो।

राखबि पीढ़ा लोटा पानी
जेवना जेंई सजी परानी
रतिया डँसाइबि सेजरिया बलम
अंगनइया रखइहS हो।

✍️ संगीत सुभाष,
प्रधान सम्पादक, “सिरिजन”, भोजपुरी पत्रिका।
“जय भोजपुरी-जय भोजपुरिया”
मुसेहरी बाजार, गोपालगंज।